ស្វាយរៀងៈ តុលាការខេត្តស្វាយរៀង មិនបានឃាត់ខ្លួនជនសង្ស័យ ដែលជាអតីតអភិបាលក្រុងបាវិត ទៅតាមការទទូចរបស់ជនរងគ្រោះ អង្គការសង្គមស៊ីវិលចំនួន ៣២ និងមជ្ឈដ្ឋានជាច្រើនទៀតនោះទេ បើទោះបីជាជនសង្ស័យ បានសារភាពថា ខ្លួនបានបាញ់ប្រហារទៅលើកម្មករក្តី។
លោកឈូក បណ្ឌិត អតីតអភិបាលក្រុងបាវិត ជាជនសង្ស័យតែម្នាក់គត់ ក្នុងការបាញ់ប្រហារ ទៅលើកម្មករ ៣ នាក់ ឲ្យរងរបួសធ្ងន់ នៅក្នុងការតវ៉ាមួយ កាលពីថ្ងៃទី ២០ ខែកុម្ភៈ បានចូលខ្លួនទៅឆ្លើយបំភ្លឺស្ងាត់ៗ មុនពេលកំណត់ នៅតុលាការខេត្តស្វាយរៀង កាលពីម្សិលមិញ បន្ទាប់ពីបានបាត់ខ្លួន ចាប់តាំងពីថ្ងៃបាញ់ប្រហារនោះមក។ តាមដីការរបស់តុលាការ ខេត្តស្វាយរៀង លោកឈូក បណ្ឌិត ត្រូវចូលទៅបំភ្លឺ នៅថ្ងៃសុក្រនេះ។
លោក ហ៊ឹង ប៊ុនជា ព្រះរាជអាជ្ញាខេត្តស្វាយរៀង បានថ្លែងថា ជនសង្ស័យ ឈូក បណ្ឌិត បានចូលខ្លួនទៅបំភ្លឺនៅតុលាការរួចហើយ កាលពីព្រឹកថ្ងៃព្រហស្បតិ៍ម្សិលមិញ គឺមួយថ្ងៃមុនដីកាកោះ។ លោក បានថ្លែងថា៖ «ខ្ញុំបានសាកសួរគាត់រួចហើយ ព្រឹកមិញ (ថ្ងៃព្រហស្បតិ៍)។ គាត់មកជាមួយមេធាវី។ គាត់ក៏បានទទួលស្គាល់នូវការបាញ់នោះ តែគាត់ឆ្លើយពីមូលហេតុច្រើនណាស់ ខ្ញុំមិនអាចប្រាប់បានទេ»។
នៅពេលដែលសួរថា ហេតុអ្វីបានជាមិនព្រមឃាត់ខ្លួន នៅពេលជនសង្ស័យសារភាព ពីការបាញ់ប្រហារ ទៅលើកម្មករនោះ លោកព្រះរាជអាជ្ញា ហ៊ឹង ប៊ុនជា បានឆ្លើយថា៖«នេះជាសិទ្ធិរបស់ខ្ញុំ ក្នុងការមិនឃាត់។ នេះមិនចាំបាច់ផង។ ខ្ញុំធ្វើការអង្កេតតាមតែតួនាទី និងនីតិវិធី»។
លោក ឈូក បណ្ឌិត មិនអាចទាក់ទង សុំការអធិប្បាយបានទេ ពីម្សិលមិញ។ ចំណែកលោកស្រី ម៉ៅ សំពុទ្ធាវី មេធាវីការពារក្តីឈូក បណ្ឌិត បាននៅស្ងៀម នៅពេលដែលប្រាប់ថា ទូរស័ព្ទពីកាសែតភ្នំពេញ ប៉ុស្តិ៍ មុននឹងហុចទូរស័ព្ទ ទៅឲ្យបុរសម្នាក់និយាយថា ច្រឡំលេខ។ ភ្នំពេញ ប៉ុស្តិ៍ បានព្យាយាមទូរស័ព្ទ ទៅកាន់លេខមួយខ្សែទៀត របស់មេធាវីរូបនេះប៉ុន្តែបុរសម្នាក់បានទទួលទៀត ដោយប្រាប់ថា ច្រឡំលេខនៅពេលដែលប្រាប់ថា ភ្នំពេញប៉ុស្តិ៍។
លោក សំ ប្រជាមានិត នាយខុទ្ទកាល័យក្រសួងយុត្តិធម៌ថ្លែងថា ក្នុងករណីព្រហ្មទណ្ឌ គឺជានីតិវិធីរបស់ព្រះរាជអាជ្ញា ក្នុងការឃាត់ខ្លួន ឬមិនឃាត់ខ្លួន។ លោកថ្លែងថា៖«បើជនសង្ស័យមានលំនៅដ្ឋាន ហើយប្រាកដថា មិនរត់គេចខ្លួន និងបានតម្កល់ប្រាក់នៅតុលាការ ដូច្នេះជនសង្ស័យមិនត្រូវគេចាប់ខ្លួនទេ»។
កម្មការិនី ប៊ុត ចិន្តា ដែលត្រូវគ្រាប់កាំភ្លើងទម្លុះដើមទ្រូង បានថ្លែងថា នាងមានអារម្មណ៍មិនល្អទេ ពេលឮថា ជនសង្ស័យ មិនត្រូវបានតុលាការចាប់ខ្លួន នៅពេលចូលទៅបំភ្លឺ។ កញ្ញាបានថ្លែងថា៖ «ខ្ញុំខឹងថា បើគាត់ (ឈូក បណ្ឌិត) បាញ់ ហេតុអ្វីតុលាការ មិនចាប់ខ្លួនគាត់។ អ្នកណាក៏ដឹងថា គាត់ជាអ្នកបាញ់ខ្ញុំ និងអ្នកផ្សេងដែរ។ ខ្ញុំចង់ឲ្យតុលាការរកខុសត្រូវរឿងបាញ់នេះ»។ នាងបន្តថា៖ «ខ្ញុំនៅតែបារម្ភពីសុវត្ថិភាពខ្ញុំ ព្រោះគាត់នៅមានសេរីភាពនៅឡើយ»។
នៅក្នុងសេចក្តីថ្លែងការណ៍រួមមួយ ដែលភ្នំពេញ ប៉ុស្តិ៍ ទទួលបាន កាលពីម្សិលមិញ អង្គការសង្គមស៊ីវិលចំនួន ៣២ បានអំពាវនាវសូមឲ្យផ្តល់យុត្តិធម៌ ដល់កម្មការិនីវ័យក្មេង ៣ នាក់ ដែលបានទទួលរងនូវការបាញ់ប្រហារ នៅក្រុងបាវិត។
អង្គការសង្គមស៊ីវិលទាំងនេះ បានទាមទារថា៖ «យើងទាំងអស់គ្នា សូមធ្វើការអំពាវនាវ ដល់អាជ្ញាធរគ្រប់លំដាប់ថ្នាក់ សូមធ្វើការចាប់ខ្លួនខ្មាន់កាំភ្លើង នៃអំពើបាញ់ប្រហារយ៉ាងឃោរឃៅ នៅក្រុងបាវិត»។ សេចក្តីថ្លែងការណ៍ដដែលបន្តទៀតថា៖«យើងសូមអំពាវនាវដល់រាជ រដ្ឋាភិបាលត្រូវតែសម្តែងនូវ ឆន្ទៈអនុវត្តច្បាប់ ដើម្បីឲ្យប្រាកដថា ករណីបាញ់ប្រហារនេះ ជាឧទាហរណ៍គំរូនៃការអនុវត្តនីតិរដ្ឋ និងសូមកុំឲ្យករណីនេះ ក្លាយជាការបង្ហាញ ពីនិទ្ទណ្ឌភាពមួយថែមទៀតនៅកម្ពុជា»។
លោក សុក សំអឿន នាយកប្រតិបតិ្ត នៃក្រុមអ្នកច្បាប់ ការពារសិទិ្ធកម្ពុជា បានថ្លែងថា ព្រះរាជអាជ្ញា អាចដោះលែងជនសង្ស័យ តាមបច្ចេកទេស ដោយមិនស្នើសុំចៅក្រមស៊ើបអង្កេតចាប់ខ្លួនប្រសិនបើគាត់មាន គោលបំណងចោទប្រកាន់ជនសង្ស័យ ពីបទបង្ករបួសស្នាម។ លោកបន្ថែមថា៖ «ខ្ញុំគិតថា បើគាត់ប្រើកាំភ្លើង យើងហៅថា កម្លាំងរូបកាយ។ ប្រសិនបើគាត់បាញ់ ទោះបីចំជើងក៏ដោយ វាអាចបង្កការខូចខាតធ្ងន់ធ្ងរ»។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានថ្លែងថា ជាការបរាជ័យរបស់ព្រះរាជអាជ្ញាជាថ្មីម្តងទៀត ដើម្បីចាប់ខ្លួនជនសង្ស័យដែលនេះ អាចជាភស្តុតាងបន្ថែមទៀត នៃអំពើពុករលួយក្នុងករណីនេះដែលចាំបាច់ត្រូវធ្វើការស៊ើប អង្កេត។ លោកថ្លែងថា៖«ពួកគេពុំបានខិតខំធ្វើការស៊ើបអង្កេតទេ ព្រោះបញ្ហាទាំងមូល ត្រូវបានកំណត់លទ្ធផលជាមុនរួចទៅហើយ»។ លោកបន្តថា៖ «វាជាឧទាហរណ៍យ៉ាងច្បាស់មួយទៀត នៃវប្បធម៌និទ្ទណ្ឌភាពដែលកំពុងបន្តរីករាលដាល នៅក្នុងប្រទេសនេះ»។
លោក អំ សំអាត អ្នកស៊ើបអង្កេតជាន់ខ្ពស់ អង្គការលីកាដូ បានថ្លែងថា លោក ចង់ឲ្យតុលាការចាត់វិធានការ ទៅតាមច្បាប់លើករណីនេះ បើទោះបីជាមានមន្រ្តីជាន់ខ្ពស់រដ្ឋាភិបាលនៅពីក្រោយខ្នងក៏ ដោយ។ លោក បញ្ជាក់ថា៖ «តុលាការត្រូវតែឯករាជ្យ មិនត្រូវស្ថិតនៅក្រោមសម្ពាធនយោបាយទេ»៕
រាយការណ៍បន្ថែម David Boyle
No comments:
Post a Comment