.jpg)
នៅពេលដែលប្រជាពលរដ្ឋបានធ្វើដំណើរទៅដល់វត្តបទុមវត្តីត្រូវបាន កំលាំងអាជ្ញាធរមានសមត្ថកិច្ចស្លៀកពាក់ឯកសណ្ឋានជានគរបាល និងមានកំលាំង សណ្តាប់ធ្នាប់ ខណ្ឌដូនពេញបានធ្វើការមកស្ទាក់ដំណើររបស់ប្រជាពលរដ្ឋដោយមិនអោយបន្តទៅ ភូមិគ្រឹះសម្តេចនាយករដ្ឋមន្ត្រី ហ៊ុន សែន នោះទេ។
បន្ទាប់ពីមានការហាមឃាត់មិនអោយបន្តដំណើរទៅមុខបាន ក្រុមប្រជាពលរដ្ឋបាននាំគ្នាលត់ជង្គង់ នៅកណ្តាលផ្លូវទីដែលនគរបាលឃាត់ ដើម្បី ធ្វើយ៉ាងណាអោយលិខិតរបស់ពួកគាត់បានទៅដល់ សម្តេចនាយករដ្ឋមន្ត្រី។ ពីព្រោះប្រជាពលរដ្ឋ បានដាក់លិខិតជាច្រើនដងមកហើយ មិនមានការឆ្លើយតបអ្វីនោះទេ។
ដោយមានការសម្របសម្រួលគ្នារវាងប្រជាពលរដ្ឋ និងអាជ្ញាធរ ក្រុមប្រជាពលរដ្ឋក៏បាននាំគ្នាឈរនៅចញ្ចើមផ្លូវ ដើម្បីរៀបចំ លិខិតដាក់ជូន សមម្តេចនាយករដ្ឋមន្ត្រី តែមិនត្រូវបានមន្ត្រីខុទ្ទកាល័យទទួលយកទេ ដោយសារតែថ្ងៃអាទិត្យមិនមានអ្នកធ្វើការ។
ហេតុដូចនេះប្រជាពលរដ្ឋក៏បាននាំគ្នាត្រឡប់ទៅផ្ទះវិញដោយអះអាងថា នឹងមកដាក់លិខិតជូនសម្តេចម្តងទៀតនៅថ្ងៃទី១៩ ខែមីនាស្អែក អ្នកស្រី ទេព វណ្ណី បានអោយដឹងថា គោលបំណងដែលពួកគាត់នាំគ្នាមកភូមិគ្រឹះសម្តេចនាយករដ្ឋមន្ត្រី គឺដើម្បីសុំអោយសម្តេចជួយដល់ប្រជាពលរដ្ឋដែលកំពុងតែរស់នៅ តំបន់បឹងកក់។
ទី១-សុំអោយប្រជាពលរដ្ឋដែលកាត់ចេញអោយមានសិទ្ធិរស់នៅក្នុងទំហំ ដី១២.៤៤ហិកតាដែលសម្តេចបនប្រទានកម្មអោយប្រជាពលរដ្ឋ និងផ្តល់ប្លង់ កម្មសិទ្ធិ។ ទី២-សុំអោយសម្តេចនាយករដ្ឋមន្ត្រីជួយធ្វើប្រព័ន្ធលូដើម្បីអោយបាន មុនរដូវវស្សា និងបោះព្រំប្រទល់ដី១២.៤៤ហិកតាដោយគ្មានឈ្មោះ ក្រុមហ៊ុន ឬឈ្មោះអ្នកណាមួយមានសិទ្ធិយកប្លង់ក្នុងដី១២.៤៤ហិកតាក្រៅពី ប្រជាពលរដ្ឋដែលកំពុងតែរស់។ ទី៣-សុំអោយសម្តេច អន្តរាគមន៍ដែរ បញ្ហាប្រព័ន្ធតុលាការ និងមន្ត្រីសាលារាជធានីភ្នំពេញដែលបំពាន និងបង្កបញ្ហាចលាចលអត់ឈប់ឈរ។
ពីព្រោះសម្តេចបានផ្តល់ដី១២.៤៤ហិកតា អោយប្រជាពលរដ្ឋហើយនៅតែបង្កបញ្ហាឡើងដដែលៗ ដូចជាយកប្រព័ន្ធតុលាការ មកគាបសង្កត់ប្រជាពលរដ្ឋ ដែលរងគ្រោះដោយសារដីធ្លី ហើយបំពានអនុសាសន៍សម្តេច និងអនុក្រឹត្យដែលបានផ្តល់ដីអោយប្រជាពលរដ្ឋ ហើយសុំអោយសម្តេចជួយធ្វើអន្តរាគមន៍។
សូមជម្រាបថា សម្តេចនាយករដ្ឋមន្ត្រី ហ៊ុន សែន បានផ្តល់ដី ១២.៤៤ ហិកតា ជាប្រទានកម្មដល់ប្រជាពលរដ្ឋតំបន់បឹងកក់។ ប៉ុន្តែរហូតមកដល់ពេលនេះ នៅតែមានបញ្ហាតវ៉ាពីសំណាក់ប្រជាពលរដ្ឋ ដោយសារតែសាលារាជធានិភ្នំពេញមិនបានធ្វើការកំណត់ព្រំប្រទល់ដី១២.៤៤ ហិកតា អោយប្រជាពលរដ្ឋ បានដឹងថានៅកន្លែងណា និងបានកាត់ប្រជាពលរដ្ឋជិត១០០គ្រួសារចេញមិនអោយស្ថិតក្នុងដី១២.៤៤ ហិកតា រួមទាងបញ្ហាផ្សេងទៀត ដែលកត្តានេះហើយបានបង្កជាបញ្ហាមិនចេះចប់មិនចេះហើយ៕
No comments:
Post a Comment