ភ្នំពេញៈ លោក ហ៊ុន តូ ក្មួយ ប្រុសលោកនាយករដ្ឋមន្ត្រី ហ៊ុន សែន ដែលជា កូនប្រុសលោក ហ៊ុន ណេង អភិបាលខេត្ត កំពង់ចាម បានចេញមុខច្រាន ចោល និងគំរាមដាក់ ពាក្យបណ្តឹង ទៅកាន់ ក្រសួងមហាផ្ទៃ និង ស្ថានទូតអូស្ត្រាលី ចំពោះ ការចុះ ផ្សាយ អត្ថបទ មួយក្នុង កាសែត ឌឹ អេជ (The Age) របស់ អូស្ត្រាលី ដែលថា លោកជាប់ ពាក់ព័ន្ធ នឹងឧក្រិដ្ឋ កម្មគ្រឿងញៀនហេរ៉ូអ៊ីន និង ការលាង លុយកខ្វក់។ លោក ហ៊ុន តូ បាន ប្រាប់ភ្នំពេញ ប៉ុស្តិ៍ កាល ពីថ្ងៃម្សិលមិញថា លោកទើបបានដឹងពីដំណឹងនេះ ហើយគ្រោងប្តឹងបកប្រឆាំងនឹងកាសែតអូស្ត្រាលីមួយនេះ។ លោកថ្លែងថា៖ «វាមិនសម ហើយចេះតែចោទផ្តេសផ្តាស។ ថ្ងៃនេះ (ចន្ទ) ម៉ោង ៣ រសៀល ខ្ញុំនឹងជួបឯកឧត្តម ខៀវ សុភ័គ ដើម្បីដាក់ពាក្យទៅក្រសួងមហាផ្ទៃមួយ ហើយទីពីរ ខ្ញុំនឹងដាក់ពាក្យ
បណ្តឹងនេះទៀត ទៅកាន់ស្ថានទូតអូស្ត្រាលី។ ខ្ញុំនឹងរកមេធាវីបរទេស នៅអូស្ត្រាលី ដើម្បីធ្វើការរឿងនេះ សុំឲ្យកាសែតនេះ បង្ហាញភស្តុតាងថា ខ្ញុំពាក់ព័ន្ធរឿងនោះ»។ លោក ហ៊ុន តូ បានបន្តថា ៖ «អ្នកឯងជាកាសែតក្នុងប្រទេសមានច្បាប់។ អ្នកឯងត្រូវតែបង្ហាញភស្តុតាង។ ប្រទេសយើង ក៏ជាស្រុកមានច្បាប់ដែរ បើខ្ញុំពាក់ព័ន្ធ មិនចាំបាច់អូស្ត្រាលីចាប់ទេ នាយករដ្ឋមន្ត្រីយើងឲ្យគេចាប់ខ្ញុំ ក្នុងប្រទេសនេះហើយ»។ ទោះជាយ៉ាងណាក៏ដោយ លោកហ៊ុន តូ មិនបានប្រាប់ឲ្យដឹងពីពេលវេលាជាក់លាក់ ក្នុងការដាក់ពាក្យប្តឹងនោះទេ។ លោក ហ៊ុន តូ បានឲ្យដឹងថា របររកស៊ីរបស់លោក នៅក្នុងប្រទេសខ្មែរ មានក្រុមហ៊ុនរកស៊ីប្រេង និងជំនួញកាស៊ីណូ ដែលមានតាំងពីឆ្នាំ ២០០៧ មក។ ប្រតិកម្មរបស់ឧកញ៉ា ហ៊ុន តូ កើតឡើង បន្ទាប់ពីមានកាសែត ឌឹ អេជ បានចុះផ្សាយកាលពីថ្ងៃអាទិត្យថា លោកហ៊ុន តូ ពាក់ព័ន្ធនឹងក្រុមឧក្រិដ្ឋជនរកស៊ីជួញដូរគ្រឿងញៀនហេរ៉ូអ៊ីននិងលាងលុយកខ្វក់ ហើយនគរបាលជាតិអូស្រ្តាលី បានរៀបចំគម្រោងចាប់ខ្លួនលោកហ៊ុន តូ ក្នុងទីក្រុងមែលប៊ន។ ប៉ុន្តែគម្រោងនេះ ត្រូវអាក់ខានដោយសារស្ថានទូតអូស្ត្រាលីនៅភ្នំពេញ បានបដិសេធ មិនផ្តល់ទិដ្ឋាការ ដោយអះអាងថា ជាការ «ចៀសវាងឧប្បតិ្តហេតុខាងការទូត» រវាងប្រទេសកម្ពុជា និងអូស្ត្រាលី។ ទោះយ៉ាងណា លោក ហ៊ុន តូ ក៏បានប្រាប់ផងដែរថា កាលពីឆ្នាំ ២០០៣ ទិដ្ឋាការចេញ-ចូលអូស្ត្រាលីរបស់់លោក មិនត្រូវបានផ្តល់ឲ្យឡើយ ដោយរដ្ឋាភិបាលអូស្ត្រាលី បានសង្ស័យថា លោកបានពាក់ព័ន្ធនឹងឧក្រិដ្ឋកម្មគ្រឿងញៀន ប៉ុន្តែ បញ្ហានោះ ត្រូវបានបកស្រាយចប់អស់ហើយ ហើយមកដល់ពេលនេះ លោកបានចេញចូលទៅប្រទេសអូស្ត្រាលីជាធម្មតា ដើម្បីទៅលេងកូនៗ ដែលមានសញ្ជាតិអូស្ត្រាលីផងដែរ។ លោកបានបន្តថា៖«ឥឡូវគ្មានគេបដិសេធវីសាអីទេ។ ខ្ញុំបានទៅអូស្ត្រាលីកាលពីបីបួនខែមុន។ ពីរឆ្នាំមុន គេធ្លាប់ផ្តល់សញ្ជាតិអូស្ត្រាលីឲ្យខ្ញុំ តែខ្ញុំអត់យក។ កាន់ប៉ាស្ព័រ(លិខិតឆ្លងដែន)ខ្មែរយើង ទៅទីណាក៏បាន។ ម្យ៉ាងខ្ញុំក៏ពាក់ព័ន្ធជាមួយគ្រួសារអ្នកនយោបាយជាន់ខ្ពស់។ កាន់ប៉ាស្ព័រគេអត់ល្អទេ។ ខ្ញុំចេញចូលអូស្ត្រាលីរហូតមក»។ ស្ថានទូតអូស្រ្តាលី ប្រចាំរាជធានីភ្នំពេញ បានថ្លែងថា៖ «ខ្លួនយល់អំពីការរាយការណ៍របស់ប្រព័ន្ធផ្សព្វផ្សាយកាលពីពេល ថ្មីៗស្តីពីការស៊ើបអង្កេតទៅលើបណ្តាញជួញដូរថ្នាំញៀននៅក្នុងតំបន់ ពាក់ព័ន្ធទៅនឹងព្រឹត្តិការណ៍ដែលសង្ស័យថា បានកើតមានកាលពីប៉ុន្មានឆ្នាំមុន»។ អ្នកនាំពាក្យស្ថានទូតអូស្ត្រាលីប្រចាំនៅប្រទេសកម្ពុជាម្នាក់ បានថ្លែងថា៖ «វាមិនសមស្របនោះទេ សម្រាប់ស្ថានទូត ក្នុងការធ្វើអត្ថាធិប្បាយ ស្តីពីបញ្ហាការដាក់ពាក្យសុំទិដ្ឋាការ របស់បុគ្គលណាម្នាក់ ឬបញ្ហាការអនុវត្តច្បាប់»។ អ្នកនាំពាក្យរូបនេះបន្តថា៖«នគរបាលសហព័ន្ធអូស្រ្តាលី បានអះអាងថា ខ្លួនមិនកំពុងធ្វើការស៊ើបអង្កេតលើលោក ហ៊ុន តូ នោះទេ» ប៉ុន្តែមិនបានផ្តល់សេចក្តីលម្អិតបន្ថែមឡើយ។ គណៈកម្មាការឧក្រិដ្ឋកម្មអូស្រ្តាលី ក៏ដូចគ្នានេះដែរ បានថ្លែងថា ខ្លួននឹងមិនធ្វើអត្ថាធិប្បាយលើបញ្ហាប្រតិបត្តិការ នៃគណៈកម្មាធិការនេះទេ។ កាសែត ឌឹ អេជ ក៏បានសរសេរដែរថា បុរសឈ្មោះ ផែននី ថៃ ជាបក្ខពួករបស់លោក ហ៊ុន តូ ត្រូវបាននគរបាលប្រទេសអូស្រ្តាលីចោទប្រកាន់រឿងជួញដូរគ្រឿងញៀន នេះ។ ប៉ុន្តែលោកហ៊ុន តូ បានបដិសេធថា លោកមិនស្គាល់បុរសឈ្មោះ ផែននី ថៃ នោះទេ។ លោក ហ៊ុន ណេង ឪពុករបស់លោក ហ៊ុន តូ និងជាអភិបាលខេត្តកំពង់ចាម បានថ្លែងថា កូនប្រុសលោក គ្មានមុខរបរឧក្រិដ្ឋកម្មបែបការចោទប្រកាន់នោះឡើយ។ ប៉ុន្តែលោកបានរំឭកថា ភរិយាលោក ហ៊ុន តូ ដែលមានបងប្រុសថ្លៃ នៅអូស្ត្រាលី ធ្លាប់ត្រូវនគរបាលប្រទេសនោះចាប់ដាក់ពន្ធនាគារ ពីរឿងជួញដូរគ្រឿងញៀន។ លោកនិយាយថា៖ «កូនខ្ញុំ មិនដែលរកស៊ីបញ្ហានោះទេ។ តាមខ្ញុំនៅចាំ កាលពីឆ្នាំ២០០០ ប្រពន្ធតូ បានប្រើលេខទូរស័ព្ទគាត់(ហ៊ុន តូ) តេទៅលេងបងថ្លៃ ដែលមានពាក់ព័ន្ធគ្រឿងញៀន។ អ៊ីចឹងពេលគេចាប់គាត់(បងថ្លៃ)នៅអូស្ត្រាលី ប៉ូលិសក៏រកឃើញលេខគាត់(ហ៊ុន តូ) ធ្លាប់ទាក់ទងទៅបងថ្លៃនោះ។ នោះជាលេខទូរស័ព្ទ ហ៊ុន តូ។ តែបញ្ហានេះ បានដោះស្រាយចប់ហើយ ស្ថានទូតក៏បានដឹងដែរ»។ លោកបានបន្តថា៖ «មុខរបររបស់ហ៊ុន តូ គឺជំនួញក្រុមហ៊ុននាំប្រេងចូល ហើយជាអ្នករកស៊ីដីធ្លីផងដែរ។ គាត់មានងារជា ឧកញ៉ា»។ លោក ខៀវ សាម៉ន នាយកមន្ទីរប្រឆាំងគ្រឿងញៀន ក្រសួងមហាផ្ទៃ បានបដិសេធមិនផ្តល់អធិប្បាយលើបញ្ហានេះទេ។ លោក ខៀវ សុភ័គ អ្នកនាំពាក្យក្រសួងមហាផ្ទៃ ថ្លែងថា លោកបានជួបជាមួយលោកមេធាវីរបស់ ឧកញ៉ា ហ៊ុន តូ ដើម្បីពិភាក្សា ពីការដាក់ពាក្យប្តឹង កាសែតអូស្ត្រាលីមួយនេះ មកកាន់ក្រសួងរបស់លោក។ លោកថ្លែងថា៖ ខ្ញុំបានពិនិត្យមើលព័ត៌មាននេះហើយ វាមិនពិតទេ។ ឈ្មោះ ហ៊ុន តូ អត់មាន record (កំណត់ត្រា) ថាពាក់ព័ន្ធគ្រឿងញៀនទេ ហើយឈ្មោះគាត់ ក៏អត់មានក្នុងបញ្ជីខ្មៅបណ្តាញគ្រឿងញៀនសកលអីដែរ»។ លោកបន្តថា៖ «បើមានមែន សមត្ថកិច្ចអូស្ត្រាលី នឹងទាក់ទងមកសមត្ថកិច្ចកម្ពុជា ពីព្រោះយើងធ្វើការជាមួយគ្នាយ៉ាងស្និទ្ធ លើការបង្ក្រាបការជួញដូរគ្រឿងញៀន»។ បន្ទាប់ពីជំនួបជាមួយ លោកឧបនាយករដ្ឋមន្ត្រី ហោ ណាំហុង កាលពីព្រឹកម្សិលមិញ លោក បបខារ (Bob Carr) រដ្ឋមន្ត្រីការបរទេសប្រទេសអូស្ត្រាលី បានបដិសេធមិនផ្តល់អធិប្បាយ ពីព័ត៌មាន ពាក់ព័ន្ធនឹងករណីក្មួយប្រុស របស់លោកនាយករដ្ឋមន្ត្រីហ៊ុន សែននេះទេ ដោយនិយាយថា៖ «ខ្ញុំមិនអាចបញ្ជាក់បានពីដំណឹងនេះទេ ហើយខ្ញុំក៏នឹងមិនផ្តល់អធិប្បាយលើករណី នៃបញ្ហាការអនុវត្តច្បាប់ដែរ»។ នៅក្នុងរបាយការណ៍ជាបន្តបន្ទាប់ កាលពីប៉ុន្មានឆ្នាំមុន របស់អង្គការឃ្លាំមើលបរិស្ថានពិភពលោក គ្លូបលវីតណេស ដែលមានមូលដ្ឋាននៅក្នុងទីក្រុងឡុងដ៍ ប្រទេសអង់គ្លេស បានរាយការណ៍ថា លោកហ៊ុន តូ គឺជាអ្នករកស៊ីកាប់ឈើ ដ៏មានអំណាចធំមួយ ដែលបានធ្វើឲ្យវិនាសអន្តរាយដល់ព្រៃឈើនៅក្នុងប្រទេសកម្ពុជា ក៏ប៉ុន្តែនៅពេលនោះ លោកហ៊ុន តូ ក៏បានច្រានចោលសេចក្តីរាយការណ៍នោះផងដែរ៕
No comments:
Post a Comment