មន្ត្រីគយម្នាក់ នៅព្រលានយន្តហោះក្រុងសៀមរាប ដែលសុំមិនឲ្យចេញឈ្មោះ បាននិយាយថា មន្ត្រីគយនៅព្រលានយន្តហោះក្រុងសៀមរាប ដែលព្រួតគ្នាប្រើអំពើហិង្សាទៅស្ត្រីជនជាតិចិនម្នាក់ ដោយសារតែនាងមិនបានបង់លុយទឹកតែចំនួនជាង ១០ ដុល្លារ ទៅឲ្យពួកគេទាំងពីរនាក់នោះ ត្រូវបានដកបញ្ឈរជើងពីការងាររួចហើយ បន្ទាប់ពីមានបញ្ហាបែបនេះកើតឡើង។
មន្ត្រីគយដែលមានតួនាទី ទទួលខុសត្រូវការងារ នៅព្រលានយន្តហោះខេត្តសៀមរាប បានឲ្យដឹងបន្តទៀតថា "មន្ត្រីគយទាំងពីរនាក់នោះ ត្រូវបានកោះហោះឲ្យទៅបំភ្លឺនៅអគ្គនាយកដ្ឋានគយ និងរដ្ឋាករនៅក្រុងភ្នំពេញរួចហើយលើបញ្ហានោះ"។ បញ្ហានេះត្រូវបានដោះស្រាយបញ្ចប់ នៅឯស្នងការនគរបាលខេត្តសៀមរាបរួចអស់ហើយ ជាមួយស្ត្រីជនជាតិចិន ឈ្មោះកញ្ញា ឆឹន (Chen) ថែមទាំងមានលិខិតស្នាមបញ្ចប់បញ្ហា នៅឯស្នងការនគរបាលខេត្តសៀមរាប។
មន្ត្រីគយដដែលនោះបានឲ្យដឹង ទៀតថា ពុំមានច្បាប់កំណត់ដែលតម្រូវឲ្យភ្ញៀវដែលឆ្លងកាត់ព្រលានយន្ត ខេត្តសៀមរាប ត្រូវតែបង់លុយឲ្យក្រុមមន្ត្រីបម្រើការនៅទីនោះទេ ការទាមទារប្រាក់ក្រៅផ្លូវការបែបនេះ គឺជាអំពើខុសច្បាប់ និងបំពានពីតួនាទីរបស់មន្ត្រីគ្រប់ជំនាញ ដែលកំពុងបម្រើការនៅទីនោះ។
សូមបញ្ជាក់ថា មន្ត្រីគយតែងតែប្រព្រឹត្តអំពើមិនស្របច្បាប់នេះ ចំពោះភ្ញៀវបរទេសរាប់មិនអស់ទេ សូម្បីអ្នកទទួលខុសត្រូវនៅព្រលាននេះ ក៏បានដឹងពីទង្វើរបស់កូនចៅខ្លួនដែរ តែដោយបានទទួលផលប្រយោជន៍នោះ កន្ទេលធំបន្លំដេកទៅ។
មន្ត្រីគយខាងលើបានបញ្ជាក់តាម ទូរស័ព្ទ នៅរសៀលថ្ងៃទី១០ ខែមេសា ឆ្នាំ២០១២ថា លោកមិនបានដឹងច្បាស់ពីបញ្ហាដែលកើតឡើងនោះទេ ហើយការដាក់វិន័យចំពោះមន្ត្រីគយ ដែលបានប្រព្រឹត្តអំពើល្មើសយ៉ាងណានោះ គឺអាស្រ័យថ្នាក់លើជាអ្នកសម្រេច តែមន្ត្រីគយនោះត្រូវបានកោះហោះឲ្យទៅបំភ្លឺនៅថ្នាក់លើហើយ។ នៅក្នុងចំណោមមន្ត្រីគយចំនួនពីរនាក់ ដែលបានប្រព្រឹត្តអំពើហិង្សាទៅលើស្ត្រីទេសចរជនជាតិចិននោះ គឺមានតែមន្ត្រីគយម្នាក់ទេ ដែលមានឈ្មោះ ជ័យ ចន្ទតារា។
នៅ រសៀលថ្ងៃទី១០ ខែមេសា ឆ្នាំ២០១២នេះ គេហទំព័រ CEN ពុំអាចទាក់ទងសុំការបំភ្លឺពីលោក ស៊ូ ភិរិន្ទ អភិបាលខេត្តសៀមរាប បានទេ ដោយទូរស័ព្ទចូលច្រើនដង តែគ្មានអ្នកទទួល។
សូមបញ្ជាក់ថា សារព័ត៌មានពាណិជ្ជកម្ម (The Commercial News) ជាភាសាចិន នៅថ្ងៃទី៥ ខែមេសា ឆ្នាំ២០១២ បានចុះផ្សាយអត្ថបទមួយ មានចំណងជើងថា “មិនឲ្យធីប? ខាតបីពាន់! ប្រធានាធិបតី ហ៊ូ ចិត្តល្អណាស់ ហេតុអ្វីអ្នកឯងកំណាញ់ម្ល៉េះ?”។
កាសែតជប៉ុន ទំព័រ៦ បានរាយការណ៍កាលពីថ្ងៃទី៤ ខែមេសា អំពីភ្ញៀវទេសចរចិន មានជម្លោះជាមួយមន្ត្រីគយព្រលានយន្ដហោះខេត្តសៀមរាប ពាក់ព័ន្ធនឹងរឿងលុយធីប។ កញ្ញា ឆឹន (Chen) ត្រូវបានគេបញ្ជូនទៅកាន់មន្ទីរពេទ្យចំនួនពីរថ្ងៃមកហើយ ដោយនាងនៅតែមានស្មារតីទន់ខ្សោយ មិននិយាយស្ដី។ ពេលថ្ងៃត្រង់ ថ្ងៃទី៤ ខែមេសា អ្នករាយការណ៍ព័ត៌មានបានទៅមើលនាងម្ដងទៀត សភាពផ្លូវចិត្តរបស់នាងបានល្អប្រសើរច្រើន ហើយនាងបានបង្ហាញរឿងលម្អិតបន្ថែម។
កញ្ញា ឆឹន : ខ្ញុំចង់បានសេចក្ដីថ្លៃថ្នូរ! សុទ្ធតែនិយាយថា ចិន និងកម្ពុជា ជាអ្នកជិតខាងល្អ មិត្តល្អ បងប្អូនល្អ ដៃគូល្អ។ “ចុងក្រោយទំនាក់ទំនង វារឹងប៉ុណ្ណាទៅ? ទៅមើលនៅព្រលានយន្ដហោះទៅ នឹងដឹងហើយ”។ នៅព្រលានយន្ដហោះសៀមរាប ដោយសារតែកញ្ញា ឆឹន យឺតយ៉ាវ មានមនុស្សម្នាក់មកដណ្ដើមចូលលេខរៀង ធ្វើឲ្យនាងត្រូវនៅក្រោយ។ មន្ត្រីគយនិយាយថា : “Money, Money!” (លុយ លុយ)។ ពេលនោះកញ្ញា ឆឹន មិនខ្វល់ ប្រុងដើរបន្ត តែត្រូវគេបញ្ឈប់។ មន្ត្រីគយនិយាយថា : “Tip, Tip” (ប្រាក់ទឹកតែ/ លុយធីប)។ កញ្ញា ឆឹន តបថា : “ហេតុអ្វី! អីវ៉ាន់ខ្ញុំឆែកឆេររួចរាល់ហើយតើ”។
កញ្ញា ឆឹន នៅតែប្រុងដើរបន្ត ក៏ត្រូវគេទាញដៃម្ខាងរបស់នាង មិនឲ្យដើរទៅមុខ។ នាងខឹង ហើយនិយាយថា “កុំប៉ះខ្ញុំ!”។ ភ្លាមៗដែលមានការទាស់គ្នា ឈានទៅប៉ះខ្លួននោះ មន្ត្រីក៏បានហៅបុរសពាក់ឯកសណ្ឋានពីរនាក់ មកយកនាងទៅកន្លែងដែលកាមេរ៉ាចាប់អត់បាន សង្កត់នាងទៅនឹងដី ហើយទាត់នាងនឹងជើងយ៉ាងឃោរឃៅ។ “ខោអាវខ្ញុំ ពេលហ្នឹងត្រូវពួកវាទាញខូចអស់ ខ្ញុំត្រូវពួកវាប៉ុន្មាននាក់ហ្នឹងនាំទៅ អាម្នាក់ទៀតកាន់កាមេរ៉ាថតខ្ញុំ ពីជ្រុងផ្សេងៗគ្នា យ៉ាងលីលា/វក់ ... ការប្រមាថប្រភេទហ្នឹង បំភ្លេចមិនបានឡើយ”។ ទោះបីជាកន្លងផុតទៅពីរថ្ងៃហើយក៏ដោយក្ដី នាងបានពណ៌នាប្រាប់អ្នករាយការណ៍ព័ត៌មាន ទាំងសភាពបិទបាំងទុក្ខព្រួយ។ កញ្ញា ឆឹន ត្រូវបានគេនាំឡើងលើឡានប៉ូលិស ដើម្បីទៅកាន់ប៉ុស្ដិ៍ប៉ូលិស ដឹកកាត់ផ្លូវដែលមានតាំងរូបប្រធានាធិបតី ហ៊ូ និងព្រះមហាក្សត្រខ្មែរ។ កញ្ញា ឆឹន សួរថា ប្រធានាធិបតីពួកខ្ញុំមកបំពេញទស្សនកិច្ចនៅកម្ពុជា ផ្ដល់លុយជាច្រើនសន្ធឹកសន្ធាប់ដល់ពួកឯង ចុះហេតុដូចម្ដេចបានជាពួកឯង ធ្វើបែបនេះចំពោះជនជាតិចិនទៅវិញ?”
មន្ត្រីឆ្លើយថា : “ប្រធានាធិបតី ហ៊ូ ជិនតាវ ចិត្តល្អណាស់ ឲ្យម្ដងបួនប្រាំរយលាន ចុះអ្នកឯងម៉េចក៏ស្វិតម្ល៉េះ សូម្បីតែលុយធីបជាងដប់ដុល្លារ ក៏មិនចង់ឲ្យដែរ?” ព្រលានយន្ដហោះសៀមរាប : បដិសេធមិនធ្វើអត្ថាធិប្បាយ! មិនសម្ភាស! ព្រលានយន្ដហោះសៀមរាបពិតជាមានរឿងគួរឲ្យខ្លាចអ៊ីចឹងផង? តាមធម្មតា ពេលទៅព្រលានយន្ដហោះ មើលឃើញតែស្នាមញញឹមដ៏ទាក់ទាញ។ នៅវេលាម៉ោង ៣ រសៀលថ្ងៃទី៤ ខែមេសា អ្នកយកព័ត៌មានបានទៅព្រលានយន្ដហោះ ដើម្បីស្វែងយល់ពីស្ថានការណ៍។ ខ្ញុំ (អ្នកកាសែត) ឲ្យអ្នកបកប្រែសាកសួរទៅបុគ្គលិកព្រលាន បុគ្គលិកនិយាយថា អ្នកធ្វើការនៅព្រលានកំពុងប្រជុំ មន្ត្រីគយដែលទទួលបន្ទុក មិននៅទេ (អវត្តមាន)។ ស្រាប់តែមានមន្ត្រីម្នាក់ដើរមក ហើយពួកគេធ្វើសញ្ញាដាក់គ្នា បន្ទាប់ពីប្រាប់គ្នាគេថា ពួកអ្នកកាសែតមកព្រលាន។
ខណៈពេលដែលគេ (មន្ត្រី) ឃើញជំនួយការអ្នកកាសែតថតរូបនៅអែបនោះ ក៏ស្រែកបញ្ជាយ៉ាងសម្បើមភ្លាមថា : ដាក់ចុះ! អត់ឲ្យថតហ្អេ! លុបរូបទាំងអស់ចេញ! អ្នកកាសែតប្រាប់ទៅមន្ត្រីនោះថា ខ្ញុំនៅទីសាធារណៈនៃព្រលានយន្ដហោះ ហើយថែមទាំងគ្មានស្លាកដាក់ថាហាមថតរូបទៀត ខ្ញុំមានសិទ្ធិថត។ បើមន្ត្រីដែលទទួលបន្ទុកមិននៅ តើអាចប្រាប់ខ្ញុំថា ពេលណាគាត់ត្រឡប់មកវិញទេ ហើយអាចសម្ភាសបានទេ? មន្ត្រីនោះប្រាប់អ្នកកាសែតថា : មិនធ្វើការអត្ថាធិប្បាយ! មិនសម្ភាស! ពេលនិយាយហើយ មន្ត្រីរូបនោះសម្លក់កាមេរ៉ាអ្នកកាសែត ធ្វើឫកពារដូចជាចង់រឹបអូស។ តាមផ្លូវពីព្រលានមកកាន់ក្រុងសៀមរាបវិញ យើងនៅមានរូបថតប្រជាពលរដ្ឋស្វាគមន៍ប្រធានាធិបតី ហ៊ូ។ ពេលនេះ ខ្ញុំ (អ្នកកាសែត) អាចយល់ពីអារម្មណ៍របស់កញ្ញា ឆឹន នាពេលនោះហើយ។
គួរបញ្ជាក់ថា សម្តេចតេជោបានបញ្ជាក់ថា “សូម្បីតែវិស័យទេសចរណ៍ ខ្ញុំបាននិយាយជាមួយឯកឧត្តម ហ៊ូ ជីនតាវ នៅក្នុងពេលបាយថ្ងៃត្រង់ ខ្ញុំថា បើកម្ពុជាទទួលភ្ញៀវទេសចរចិនត្រឹមតែ ០,០១% ក៏កម្ពុជាអាចទទួលបាន ១លាន ៣សែន ៤ម៉ឺននាក់ក្នុងមួយឆ្នាំ ព្រោះប្រជាជនចិនមានទៅដល់ ១ពាន់ ៣រយ ៤០លាននាក់ ពេលនោះទេសចរណ៍កម្ពុជា នឹងមានការកើនឡើងយ៉ាងឆាប់រហ័ស”។
ទង្វើ របស់ពួកមន្ត្រីគយនៅខេត្តសៀមរាប បានសម្តែងនូវការរិះគន់ថា ការធ្វើបែបនេះ វាកាន់តែធ្វើឲ្យប៉ះពាល់មុខមាត់កម្ពុជា ជាពិសេសប៉ះពាល់ដល់អារម្មណ៍ភ្ញៀវទេសចរណ៍បរទេស ដែលកំពុងតែមានកំណើនជាង ២លាននាក់នៅឆ្នាំ២០១១ និងឆ្នាំ២០១២នេះ ដែលជាការជួយបង្កើនថិវិកាចំណូលជាតិ បានយ៉ាងច្រើនសន្ធឹកសន្ធាប់។
ចំពោះករណីនេះ ក្រុមមន្ត្រីសិទ្ធិមនុស្សបានចាត់ទុកថា ជាបទល្មើសព្រហ្មទណ្ឌប៉ះពាល់ដល់កិត្តិយសរបស់ស្ត្រីជនជាតិចិននោះ និងធ្វើឲ្យប៉ះពាល់អារម្មណ៍ភ្ញៀវទេសចរបរទេស មកកាន់ប្រទេសកម្ពុជាទៀតផង ដូច្នេះចំពោះបញ្ហានេះ អង្គភាពប្រឆាំងអំពើពុករលួយទំនងជាមិននៅស្ងៀមទេ និងមានវិធានការផ្លូវច្បាប់ ចំពោះជនល្មើសដែលជាមន្ត្រីគយនៅព្រលានយន្តហោះខេត្តសៀមរាបពុំខាន ដើម្បីលើកមុខមាត់ប្រទេសកម្ពុជា កុំឲ្យមន្ត្រីគយកំហូចនោះ ជាន់ឈ្លី ហើយថែមទាំងប៉ះពាល់ដល់មិត្តភាពរវាងកម្ពុជា និងចិន ដែលជាមិត្តភក្តិល្អ និងយុទ្ធសាស្ត្រគ្រប់ជ្រុងជ្រោយ៕
No comments:
Post a Comment