ស្ត្រីវ័យ៣០ឆ្នាំម្នាក់មកពីភូមិ១ ក្នុងតំបន់បឹងកក់ អ្នកស្រី ស្រី សុផល ថា មន្ត្រីនគរបាលដែលពាក់ឯកសណ្ឋានឈុតបៃតងចាស់ «បានលើកដៃវាយខ្ញុំពីរដៃផ្ទួនៗចំផ្ទៃមុខ និងមន្ត្រីនគរបាលម្នាក់ទៀតបានធាក់ចំភ្លៅខាងឆ្វេងនិងពោះរបស់ខ្ញុំ បណ្ដាលឲ្យខ្ញុំវិលមុខ និងចុកឆ្អល់យ៉ាងខ្លាំង»។
ចំណែកឯ មន្ត្រីនគរបាលដែលវាយមកលើអ្នកភូមិមុនគេនោះ ត្រូវបានពលរដ្ឋម្នាក់មកពីភូមិ១ ក្នុងតំបន់បឹងកក់ថតរូបជាប់ទាំងមុខនិងស្លាកឈ្មោះ ប៉ុន្តែមន្ត្រីនគរបាលរូបនោះ បានបដិសេធ ដោយនិយាយថា៖«យើងគ្មានមូលហេតុអ្វីទៅវាយពលរដ្ឋនោះទេ គឺយើងគ្រាន់តែរុញច្រានកុំឲ្យពួកគេទៅលើផ្លូវធំ(មហាវិថីព្រះនរោតម្ត)ដែលនាំឲ្យកកស្ទះចរាចរណ៍ និងខូចសណ្ដាប់ធ្នាប់»។
អ្នកស្រីបូវ សោភា អាយុ៣៦ឆ្នាំ មកពីភូមិ២៣ សង្កាត់ស្រះចក ខណ្ឌដូនពេញ ដែលមានរបួសស្នាមដាច់រលាត់ស្មងជើងឆ្វេង បាននិយាយថា ក្រុមនគរបាលប្រឆាំងកុបកម្ម បានទាត់ឈូសជើងរបស់គាត់និងស្បែកជើងប៊ូ។
អ្នកស្រីបានបញ្ជាក់ថា៖«យើងគ្រាន់តែលើកគ្នាមកដាក់ញត្តិ សុំឲ្យមានការជួយអន្តរាគមន៍បោះបង្គោលកំណត់ព្រំប្រទល់ដី១២,៤៤ហិកតា ដែលផ្តល់ដោយប្រមុខរដ្ឋាភិបាលដល់យើងខ្ញុំឲ្យបានច្បាស់លាស់ប៉ុណ្ណោះ ត្រូវកម្លាំងនគរបាលចម្រុះវាយប្រដេញ ដូចជាសត្វ»។
ដោយក្ដីឈឺចុកចាប់ក្នុងចិត្ត និងរាងកាយបានរងការវាយដំពីក្រុមសមត្ថកិច្ចផងនោះ អ្នកស្រី សួង សម័យ អាយុ៥៣ឆ្នាំ មកពីភូមិ២២ក្នុងតំបន់បឹងកក់ បាននិយាយប្រាប់ភ្នំពេញប៉ុស្តិ៍ទាំងទឹកភ្នែករលេងរលោងថា កម្លាំងសមត្ថកិច្ចនគរបាលចម្រុះបានចាប់ច្របាច់កាច់បំបាក់ម្រាមដៃចង្អុលខាងឆ្វេងរបស់គាត់ នៅពេលដែលគាត់លើកដៃចង្អុលមុខមន្ត្រីនគរបាលម្នាក់ដែលបានវាយមកលើពួកគាត់នោះ។
អ្នកស្រីនិយាយទៀតថា៖«ខ្ញុំឈឺចិត្តណាស់…ពួកគេសាហាវឃោរឃៅយង់ឃ្នងលើកដៃវាយខ្ញុំជាស្ត្រីចំណាស់ទន់ខ្សោយ ដែលអាចធ្វើជាម្ដាយរបស់ពួកគេបាន»។
តំណាងក្រុមបាតុករម្នាក់ ក្នុងចំណោមប្រាំនាក់ ដែលដាក់ច្រវាក់ដៃខ្លួនឯង ដើម្បីដាក់សម្ពាធដល់អាជ្ញាធរឲ្យបញ្ឈប់ការប្រើប្រព័ន្ធតុលាការ មកលើពួកគាត់ដែលតវ៉ាក្នុងរឿងដីធ្លី អ្នកស្រី ហេង មុំ ថា៖ «យើងបានប្រាប់ពីគោលបំណងនៃការដង្ហែក្បួនតវ៉ាទាមទាររបស់យើង ហើយបានព្យាយាមដើរតាមផ្លូវ ដែលសាលារាជធានីបានកំណត់ឲ្យ ប៉ុន្តែពួកយើងនៅតែរងការវាយបង្ក្រាបដោយហិង្សាពីកម្លាំងសមត្ថកិច្ច។ តើឯណាទៅយុត្តិធម៌?»។
លោក កើត ឆែ អនុប្រធានរដ្ឋបាលសាលារាជធានីភ្នំពេញ បានបដិសេធថា សាលារាជធានីភ្នំពេញមិនបានឯកភាពឬយល់ព្រមឲ្យមានការដង្ហែក្បួនតវ៉ានេះទេ និងបានជំរុញឲ្យសាកសួរទៅតំណាងក្រុមអ្នកតវ៉ាក្នុងតំបន់បឹងកក់ ថាតើពួកគាត់មានលិខិតអនុញ្ញាតពីសាលារាជធានីភ្នំពេញដែរឬអត់?
ទោះជាបែបណាក្ដី ក្រោយពីមានការប៉ះទង្គិចគ្នារួច ក្រុមអ្នកតវ៉ាត្រូវបានគេអនុញ្ញាតឲ្យតំណាងរបស់ពួកគេ យកញត្តិទៅដាក់នៅការិយាល័យធនាគារពិភពលោក និងសហគមន៍អឺរុប ប្រចាំកម្ពុជា រួចហើយបន្តទៅដាក់នៅសភាជាតិថែមទៀត។
អ្នកស្រីទេព វន្នី តំណាងក្រុមបាតុករមកពីតំបន់បឹងកក់បានថ្លែងថា ក្នុងរយៈពេលបីថ្ងៃកន្លងមកនេះ ក្រៅពីបានដាក់ញត្តិនៅស្ថាប័នទាំងបីខាងលើ ពួកគាត់បានដាក់ញត្តិទៅស្ថានទូត អាមេរិក ជប៉ុន អូស្ត្រាលី អង់គ្លេសនិងស្ថាប័នព្រឹទ្ធសភាផងដែរ។
លោក ចាន់ សូវេត អ្នកឃ្លាំមើលសិទ្ធិមនុស្សនៃអង្គការអាដហុក បាននិយាយថា តាមការពិនិត្យភាពជាក់ស្ដែងនៃការដើរក្បួនតវ៉ា ប្រជាពលរដ្ឋមានភាពខុសឆ្គងត្រង់ថាពួកគាត់ដាក់ច្រវាក់ និងដោះអាវ អាក្រាតខ្លួនប្រាណ ប៉ុន្តែទង្វើនេះគឺជាជម្រើសចុងក្រោយរបស់ពួកគាត់ ដែលបានប្រឹងប្រែងអស់ពីលទ្ធភាពនិងរយៈពេលជាយូរមកហើយ ដើម្បីតែដីធ្លីនិងទីជម្រករបស់ពួកគាត់ត្រូវបានគេរំលោភបំពានយក។ លោក បន្តថា៖ «បើសិនជាអាជ្ញាធរនៅតែបន្តការបង្ក្រាប ជាជាងរកដំណោះស្រាយ យើងយល់ថាការនេះនឹងនាំឲ្យអន្តរាយដល់រដ្ឋាភិបាល…» ៕
No comments:
Post a Comment