ថ្ងៃទី១៤កុម្ភៈឆ្នាំនេះ សកម្មភាពនៃការទប់ស្កាត់ភាពភ្លើតភ្លើនរបស់យុវវ័យខ្មែរហាក់មានភាព ផុលផុសជាងពេលណាៗទាំងអស់។ សាលារៀនជាច្រើនបានរៀបចំកម្មវិធីនៅចំថ្ងៃទី១៤កុម្ភៈនេះដើម្បី ផ្តល់សារអប់រំដល់សិស្សកុំឲ្យឈ្លក់វង្វេងនឹងភាពស្រើបស្រាលខុស ទំនង។ ការដាក់លក់ផ្កានៅក្បែរសាលាត្រូវបានហាមឃាត់។ នៅខេត្តខ្លះ ផ្កាសម្រាប់ជូនអំណោយត្រូវបានគេហាមមិនឲ្យលក់តែម្តងកាលពីថ្ងៃ ម្សិលមិញ។
នៅតាមកញ្ចក់ទូរទស្សន៍ ក្រសួងកិច្ចការនារីបានរៀបចំស្ប៉តអប់រំស្តីពីទិវានៃក្តីស្រឡាញ់ ដើម្បីកុំឲ្យយុវវ័យយល់ខុស។ សារព័ត៌មានជាច្រើនក៏បាននាំគ្នានិយាយពីបញ្ហានេះដោយបង្ហាញឧទាហរណ៍ ជាច្រើនដែលជាគ្រោះថ្នាក់សម្រាប់យុវវ័យខ្មែរ។ លោកនាយករដ្ឋមន្ត្រី ហ៊ុន សែន ក៏បានអំពាវនាវជាសាធារណៈកុំឲ្យយុវវ័យយកថ្ងៃ១៤កុម្ភៈធ្វើជាថ្ងៃ នាំគ្នាឡើងផ្ទះសំណាក់។ អាជ្ញាធរដែនដីក៏បានរឹតបន្តឹងសន្តិសុខ និងសណ្តាប់ធ្នាប់នៅតាមផ្ទះសំណាក់ និងសណ្ឋាគារនានាដើម្បីបង្ការកុំឲ្យក្មេងៗដែលមិនទាន់គ្រប់អាយុជួល បន្ទប់ស្នាក់នៅ។ ឪពុកម្តាយជាច្រើនក៏ហាក់បានព្យាយាមឃុំគ្រងកូនៗក្នុងថ្ងៃនោះដែរ ពោលគឺទាំងអស់គ្នាហាក់បានចូលរួមយ៉ាង សកម្មដើម្បីទប់ស្កាត់គ្រោះថ្នាក់ដែលកំពុងបង្ហាញឡើងយ៉ាងច្បាស់នៅ ចំពោះមុខយើង។
ទាំងនេះជាសញ្ញាល្អមួយសម្រាប់សកម្មភាពតម្រង់ទិសសង្គម ដែលទោះតិចឬច្រើនវាច្បាស់ជាមានលទ្ធផលជាមិនខាន។ ជាក់ស្តែង ទិវានៃក្តីស្រឡាញ់ឬ Valentine’s Dayឆ្នាំនេះ ត្រូវគេសង្កេតឃើញជាទូទៅថាមិនសូវមានសកម្មភាពជ្រួលជ្រើម អនាធិបតេយ្យដូចកាលពីឆ្នាំមុនៗពេកទេ។ នេះសបញ្ជាក់ថា យុវវ័យជាច្រើនបានទទួលសារអប់រំ ហើយមានភាពប្រយ័ត្នប្រយែងជាងមុនបើទោះបីជាទិវានេះនៅតែជាការពេញ និយមយ៉ាងខ្លាំងរបស់យុវវ័យខ្មែរក៏ដោយ។
ជាការពិត គេមិនអាចលុបបំបាត់សកម្មភាពនេះទាំងស្រុងបានទេពីព្រោះជាសិទ្ធិ សេរីភាពរបស់មនុស្ស។ ប៉ុន្តែ គេគួរតម្រង់ទិសយុវវ័យកុំឲ្យរអិលផ្លាតធ្លាក់ក្នុងគ្រោះថ្នាក់។ អ្វីដែលគេសង្កេតឃើញជាទូទៅកាលពីថ្ងៃទី១៤កុម្ភៈគឺ ចាប់ពីពេលព្រឹកដល់ពេលរសៀល សកម្មភាពហាក់ដូចជាស្ងប់ស្ងាត់បន្តិចមែន ប៉ុន្តែ នៅពេលល្ងាច និងពេលយប់ ចរាចរណ៍ក្នុងទីក្រុងភ្នំពេញ មានសភាពណែនណាន់តាន់តាប់ខុសពីធម្មតា។ ភោជនីយដ្ឋាននានាពោរពេញដោយមនុស្សដែលអ្នកខ្លះជួបជុំពិសាអាហារ រួមគ្នាជាលក្ខណៈគ្រួសារ និងខ្លះទៀតជាលក្ខណៈគូសង្សារ។ ទិដ្ឋភាពនេះបង្ហាញថា ទិវា Valentine’s Day នៅតែមានឥទ្ធិពលយ៉ាងខ្លាំង មិនត្រឹមតែសម្រាប់យុវវ័យប៉ុណ្ណោះទេ តែក៏មានដែរក្នុងចំណោមមនុស្សទូទៅ។ ម្យ៉ាងទៀត ការជួបជុំគ្នា និងការដើរកម្សាន្តពិសាអាហាររួមគ្នាយ៉ាងច្រើនកាលពីល្ងាចថ្ងៃ អង្គារក៏បានបង្ហាញដែរថា ឪពុកម្តាយ ឬអាណាព្យាបាលរបស់យុវវ័យមួយចំនួនហាក់បានព្យាយាមឃុំគ្រងកូនចៅរបស់ ខ្លួនតាមរយៈការចាកចេញកម្សាន្តជាលក្ខណៈគ្រួសារដើម្បីកុំឲ្យពួកគេ ចេញទៅប្រព្រឹត្តអ្វីមិនគប្បីខុសពីគន្លងប្រពៃណីសង្គម។
ប៉ុន្តែ នៅតែមានឪពុកម្តាយជាច្រើនទៀតបណ្តោយកូនឲ្យចេញក្រៅម្នាក់ឯងក្នុង ថ្ងៃ Valentine’s Day កាលពីយប់ថ្ងៃម្សិលមិញដែលអនុញ្ញាតឲ្យពួកគេនៅតែមានឱកាសនាំគ្នា នែបនិត្យស្នេហានៅតាមទីស្ងាត់កំបាំងមួយចំនួន ក៏ដូចជានៅតាមផ្ទះសំណាក់ ឬសណ្ឋាគារជាច្រើនដែរ។ ការបណ្តែតបណ្តោយដោយសំអាងលើការងាររវល់របស់ខ្លួនជាកំហុសដែលឪពុក ម្តាយ ឬអាណាព្យាបាលទាំងឡាយគូរគិតគូរឡើងវិញ។
យ៉ាងណាក៏ដោយ វិធានការចម្រុះនៅមុនពេល និងអំឡុងពេលបុណ្យ Valentine’s Day នេះជាសញ្ញាល្អមួយដែលគួរតែដកបទពិសោធន៍និងបន្តធ្វើឲ្យដូចភ្លៀង រលឹម។ ជាទូទៅ យុវវ័យងាយណាស់នឹងទទួលភាពស្រើបស្រាល ប្រៀបដូចជាសត្វមមាចមិនស្គាល់ភ្លើងយ៉ាងដូច្នេះដែរ។ ដូច្នេះ មនុស្សចាស់ និងសង្គមទាំងមូលត្រូវតែចូលរួមដើម្បីតម្រង់ទិសពួកគេឲ្យបានល្អ។ ការបណ្តែតបណ្តោយគឺជាគ្រោះថ្នាក់មួយដែលពិបាកនឹងស្តារ៕