ភ្នំពេញ ប៉ុស្តិ៍
ភ្នំពេញៈ សំឡេងស្រែកទ្រហោយំរកម្តាយ ទ្រហឹងអឺងកង របស់ក្មេងៗ ជាមួយនឹងការអង្វរករ សូមឲ្យតុលាការ ដោះលែងម្តាយរបស់ពួកគេ ហើយម្តាយក៏ស្រែកយំហៅកូន ចេញពីបន្ទប់ចម្រឹងដែករបស់តុលាការមកវិញ ដែលធ្វើឲ្យអ្នកនៅក្នុងហេតុការណ៍ មានការរំជួលចិត្តយ៉ាងខ្លាំង ហើយអ្នកខ្លះបានយំតាមដែរនោះ វាមិនមែនជារឿងល្ខោន ហើយក៏មិនមែនជាឈុតថតខ្សែភាពយន្តសម័យថ្មីនោះដែរ ប៉ុន្តែវាគឺជារឿងពិត ដែលបានកើតឡើង ទៅលើអ្នកភូមិបឹងកក់ នៅមុខសាលាដំបូងរាជធានីភ្នំពេញ កាលពីម្សិលមិញ។
ប៉ុន្តែយ៉ាងណាក៏ដោយ ការស្រែកទ្រហោយំទ្រហឹងអឺងកង នៅក្នុងរង្វង់នៃការហ៊ុមព័ទ្ធ ពីសំណាក់កម្លាំងសមត្ថកិច្ចចម្រុះ រាប់រយនាក់នេះ មិនបានផ្លាស់ប្តូរទឹកចិត្តរបស់មន្ត្រីតុលាការនោះទេ ដោយនៅទីបំផុត ក្រុមស្ត្រីបឹងកក់ទាំង ១៣ នាក់ ត្រូវបានតុលាការ កាត់ឲ្យមានទោស ក្នុងម្នាក់ៗ ចំនួន ៣០ ខែពីបទជេរប្រមាថ មន្ត្រីសាធារណៈ និងរំលោភទន្ទ្រានកាន់កាប់ដីរបស់នីតិបុគ្គលសាធារណៈ បើទោះបីជាស្ត្រីទាំង ១៣ នាក់ និងក្រុមអ្នកភូមិបានធ្វើការតវ៉ាជាច្រើនឆ្នាំមកហើយ ប្រឆាំងនឹងការបូមខ្សាច់កប់ពន្លិចរំលោភយកផ្ទះរបស់ពួកគាត់ ពីសំណាក់ក្រុមហ៊ុនស៊ូកាគូអ៊ីនក៏ដោយ។ ការកាត់ទោសក្រុមអ្នកភូមិបឹងកក់ ដែលសុទ្ធតែជាស្ត្រី ដែលខិតខំប្រឹងប្រែងតវ៉ា ដើម្បីការពារផ្ទះរបស់ខ្លួន ពីការចាក់ដីកប់ពន្លិច ពីសំណាក់ក្រុមហ៊ុន ស៊ូកាគូអ៊ីន របស់លោកឡាវ ម៉េងឃីន សមាជិកព្រឹទ្ធសភា របស់គណបក្សប្រជាជនកម្ពុជានេះ បានធ្វើឡើងត្រឹមតែ ៣ ថ្ងៃប៉ុណ្ណោះ បន្ទាប់ពីការចាប់ខ្លួន។
លោក ភូ ពៅ ស៊ុន ចៅក្រមជំនុំជម្រះ បានប្រាប់ភ្នំពេញ ប៉ុស្តិ៍កាលពីម្សិលមិញថា ស្ត្រីក្នុងតំបន់បឹងកក់ទាំង ១៣ នាក់ បានជំនុំជម្រះទោសរួចហើយ ដោយម្នាក់ៗ ត្រូវមានទោសរយៈពីរឆ្នាំកន្លះ ប៉ុន្តែការអនុវត្តទោសក្នុងពន្ធនាគារ មិនដូចគ្នាទេ ក្នុងនោះ ៦ នាក់ ត្រូវអនុវត្តទោស រយៈពេលពីរឆ្នាំ ៦ ខែ ហើយ ៦ នាក់អនុវត្តទោស ២ ឆ្នាំ ព្យួរទោស ៦ ខែ និងម្នាក់ទៀត អនុវត្តទោស ត្រឹមតែមួយឆ្នាំប៉ុណ្ណោះ ហើយត្រូវព្យួរទោសរយៈពេល ១ ឆ្នាំ ៦ ខែ។ លោកបានបញ្ជាក់ថា៖«ពួកគេត្រូវបានបញ្ជូន ទៅដាក់ពន្ធនាគារហើយ»។ លោក ភូ ពៅ ស៊ុន បានបិទទូរស័ព្ទ នៅពេលដែលសួរទាក់ទងនឹងបទចោទប្រកាន់ ទៅលើស្ត្រីទាំង ១៣ នាក់នោះ។
ចំណែកឯ លោកលី សុផាណា ព្រះរាជអាជ្ញារងតុលាការរាជធានី ដែលបានចូលរួមនៅក្នុងសវនាការ ក្នុងសំណុំរឿងរបស់ស្ត្រីបឹងកក់ទាំង ១៣ នាក់នោះ មិនអាចទាក់ទងសុំការបំភ្លឺបានទេ។
លោក អំ សំអាត ទីប្រឹក្សាបច្ចេកទេស អង្គការសិទ្ធិមនុស្សលីកាដូ បានប្រាប់អ្នកយកព័ត៌មាន នៅមុខតុលាការថា ក្រុមស្ត្រីក្នុងតំបន់បឹងកក់ទាំង ១៣ នាក់ ត្រូវបានតុលាការចោទប្រកាន់ពីបទ «កាន់កាប់ដោយខុសច្បាប់ លើអចលនវត្ថុ របស់នីតិបុគ្គលសាធារណៈ តាមមាត្រា ៣៤ និងមាត្រា ២៥៩ នៃច្បាប់ភូមិបាល» និងបទចោទមួយទៀត គឺ«ប្រឆាំងអាជ្ញាធរសាធារណៈ ដោយមានស្ថានទម្ងន់ទោសតាមមាត្រា ៥០៤ នៃក្រមព្រហ្មទណ្ឌ»។
ចំណែកឯលោក ហម ស៊ុនរិទ្ធ មេធាវីការពារក្តីស្ត្រីបឹងកក់ទាំង ១៣ នាក់ បានប្រាប់ភ្នំពេញប៉ុស្តិ៍ថា លោកបានដើរចេញពីបន្ទប់សវនាការ បន្ទាប់ពីលោកចៅក្រមជំនុំជម្រះ ភូ ពៅ ស៊ុន បានច្រានចោលសំណើរបស់លោក។
លោកថ្លែងថា៖«ខ្ញុំសម្រេចដើរចេញពីបន្ទប់ជំនុំជម្រះភ្លាមៗ បន្ទាប់ពីសំណើរបស់ខ្ញុំចំនួនពីរគឺ សុំលើកការជំនុំជម្រះទៅថ្ងៃក្រោយ និងសុំបង្ហាញសាក្សីដោះបន្ទុក ត្រូវបានច្រានចោលដោយចៅក្រមជំនុំជម្រះ ព្រោះយើងគ្មានពេលគ្រប់គ្រាន់ ដើម្បីសិក្សាលើសំនុំរឿងចោទប្រកាន់មកលើកូនក្ដីរបស់ខ្ញុំទេ»។ លោកបានបន្ថែមថា៖«ខ្ញុំនឹងទៅជួបកូនក្តីរបស់ខ្ញុំ ហើយខ្ញុំនឹងដាក់បណ្ដឹងឧទ្ធរណ៍ ចំពោះការសម្រេចនេះ ប្រសិនបើពួកគេយល់ព្រម»។
កាលពីព្រឹកម្សិលមិញ អ្នកភូមិបឹងកក់ប្រមាណ ៥០ នាក់ រួមជាមួយនឹងក្មេងៗជាច្រើននាក់ បានប្រមូលផ្ដុំគ្នានៅមុខតុលាការដើម្បីតវ៉ាទាមទារឲ្យតុលាការ ដោះលែងតំណាងទាំង ១៣ នាក់របស់ពួកគេ ខណៈក្រុមកម្លាំងសមត្ថកិច្ចចម្រុះ រាជធានីភ្នំពេញប្រមាណជាង ២០០ នាក់ ដែលប្រដាប់ដោយដំបង ខែល កាំភ្លើងខ្លី កាំភ្លើងបាញ់ឧស្ម័នបង្ហូរទឹកភ្នែក បានធ្វើការឡោមព័ទ្ធ ដោយមានការបិទផ្លូវមួយចំនួនជុំវិញតុលាការ។ សវនាការពេញមួយថ្ងៃ រហូតដល់ម៉ោង ៥ និង ១០ នាទី ល្ងាច ក្រុមអ្នកតវ៉ាដែលបានយំសោកបោកខ្លួនពេញមួយថ្ងៃដែរនោះ អ្នកខ្លះបានដួលសន្លប់ ព្រោះតែតក់ស្លត់ខ្លាំងពេក ខណៈសមត្ថកិច្ចបានដឹកតំណាងពួកគេទាំង ១៣ នាក់តាមរថយន្តមីនីបើស ពណ៌ស ចំនួន ២ គ្រឿង នាំមុខដោយរថយន្តភីកអាប់ និងម៉ូតូអមពីគ្រឿង ចេញតាមច្រកទ្វារខាងលិចឆៀងខាងត្បូង ដើម្បីយកទៅឃុំខ្លួននៅគុកព្រៃស ។
សំឡេងស្រែកថា «អយុត្តិធម៌ណាស់! អយុត្តិធម៌ណាស់!» បានលាន់ឮយ៉ាងកងរំពង នៅក្នុងរង្វង់នៃការហ៊ុមព័ទ្ធរបស់សមត្ថកិច្ចរាប់រយនាក់នោះ។
វិវាទដីធ្លីដ៏រ៉ាំរ៉ៃ នៅក្នុងតំបន់បឹងកក់ បានចាប់ផ្ដើម ក្រោយពេលលោកកែប ជុតិមា អភិបាលរាជធានីភ្នំពេញ បានចុះកិច្ចសន្យាជួលដីតំបន់បឹងកក់ក្នុងរយៈពេល ៩៩ ឆ្នាំ ទៅឲ្យក្រុមហ៊ុនស៊ូកាគូអ៊ីន របស់លោកឡាវ ម៉េងឃីន សមាជិកព្រឹទ្ធសភាមកពីគណបក្សប្រជាជនកម្ពុជា កាលពីដើមខែកុម្ភៈឆ្នាំ ២០០៧ ក្នុងតម្លៃតែជាង ៧២ លានដុល្លារប៉ុណ្ណោះ ដើម្បីអភិវឌ្ឍន៍មជ្ឈមណ្ឌលពាណិជ្ជកម្មទំនើប។ គម្រោងនេះ បានធ្វើឲ្យប្រជាពលរដ្ឋរាប់រយគ្រួសារ ងើបតវ៉ា យ៉ាងក្តៅគគុក ចាប់តាំងពីពេលនោះមក នៅពេលដែលក្រុមហ៊ុនរបស់លោកឡាវ ម៉េងឃីន បានចាប់ផ្តើមបូមខ្សាច់កប់ពន្លិចផ្ទះរបស់ពលរដ្ឋជាបន្តបន្ទាប់ ទាំងអ្នកបង្ខំចិត្តទទួលយកសំណង និងអ្នកដែលមិនព្រមទទួលយកសំណង៕
No comments:
Post a Comment